Redaksi | Pedoman Media Siber | Disclamair | Kontak
Si JANGGUAL III
Pasada tahi tu na ummuli (27)

Redaksi
Rabu, 03 Jun 2020 12:00 WIB | dilihat: 12850 kali

Panggurit: M.Tansiswo Siagian.

 

“Amangoiiiii…..mardisir huhilala hatamon. Ai ido sai dipingkirhon Ama Pardomuan na di Amerika an dohot anggina Tantara i……..agoi….Tuhan tangihon hatanami on” ninna Ompu Pardomuan

“I do tingkosna Amongtua, mulak ma ahu tu huta pajongjong usaha. Olo ma nian Ompung halak si Pardomuan dohot anggina i sude, nang angka pomparan ni huta on mangalehon roha dohot pingkiranna pamaju huta on. Dohot ma muse Amongku si Mangasi paheba-hebahon i tu Pamarenta molo tarpillit ibana anggota dewan muse” ninna si Janggual .

“Ai boasa dang bulus hian ho jongjong gabe anggota dewan unang apala amongmi. Ai nunga 5 taon hupaima so adong pingkiranna pamaju huta on. Alai ndang hinata tahe, holan na paulakhon harugianna tingki parkisingon na uju i do rohana, ai so margagan suda i na masaha i”ninna Ompu Pardomuan.

Tompu adong muse ro ama na poso. Dipahundul jonok tu Ompu Pardomuan.

“Aha hian Ompung, ditonahon ho ahu na bodari”ninna manungkun Ompu Pardomuan.

“Dok jolo tu asida asa dijomurhon jolo eme i saotik, nunga naeng suda poang boras laho dahanonku. Huhut muse, bodari di jolo jabu on sosialisasi si Mangasi anggiat tarpillit muse  anggota dewan. Aha do dipatupa hamu didok si Mangasi…….Ehhhh ditanda ho do on anak ni si Mangasi?” ninna Ompu Pardomuan.

“Bah tangkas do hutanda on Ompung. Tagan SMP rap sasingkola do hami alai di turongku dua taon” ninna Ama naposo i.

“Si Manarsar. Alai tamba marbirong huida?” ninna si Janggual jongjong manjalang si Manarsar.

“Muba mokmokmu antong dung mangoli. Nunga sada nak ni on. Ai di hutaon do ibana PNS guru SD dohot pahompu boru i, holan tammat ibana sian Siantar pintor lulus muse ibana PNS. Jala so sanga mangulon pintor mangoli do muse ibana”ninna Ompu Pardomuan.

Dang pola leleng si Manarsar di jabu i ala ingkon laho do ibana mangajar, jala ingkon sangahononna annon patontu jolma laho manjomur eme ni dok ni Ompu Pardomuan i. Nian bangkol do roha ni si Manarsar mamintor manadingkon si Janggual, alai ala ulaonna gabe morot ma ibana dung marjanji nasida pajumpang bodari.

Marganjang ma muse nonang ni si Janggual dohot Ompu Pardomuan. Taringot tu na so adong agia aha na saleleng on di bahen si Mangasi tu huta. Taringot tu tahi ni si Janggual laho tu huta pajongjong usaha. Taringot tu na naeng mansalon muse si Mangasi mulak.

“Boha boi do haposan si Mangasi amongmon? Nian na saleleng on dang pola si insahan roha ni on. Alai dung dewan ma ibana, laos so musmus be huida parsaoranna di huta on. Unang do ala naung dilehon ibana hepeng asa dipillit halak na uju i gabe hira naung sae utangna dung hundul ibana dewan”ninna Ompu Pardomuan.

Hohom si Janggual. Nangkin nunga nian didok ibana na laho ibana di jolo manangging amongna i manang manarat amongna i sian karosi dewanna i molo so olo patupa hamajuon tu huta nasida i. Dihatindangkon si Janggual ingkon ibana di jolo muruk tu amongna molo dung hundul haduan alai ndang dibahen na denggan pamaju huta nasida i.

Manat do Ompu Pardomuan. Dang ansung songon i rohana laho mangidohon tu na sahuta i asa mamillit si Mangasi jala na so tupa manjalo togu-togu ro. Biar rohana so tung gabe tos roha ni dongan hutana i, molo gabe mandao so mangingot padan muse haduan si Mangasi. Ai nunga somal songon i molo anggota dewan. Molo tingki kompanye muba burjuna, marapipurun hatana. Tompu panise, tompu hira apala pamili hata dohot burjuna. Alai sanjurap do i, holan tingki kompanye do i. Holan tarpillit ibana, kassa ni mobilna pe so he diungkap molo toho mamolus marsilaosan dohot tinandana. Nunga angir be tano di anggo, lalap sai dompak ginjangnama dibereng so ditailihon ise mamillit ibana gabe lambok hundulanna.

Dipungka si Janggual muse hatana taringot tu sangkapna laho mulak tu huta jala dung mangoli. Jala ingkon tading di huta ni ompungna i do ibana ndang olo di jabu ni amongna. Disi ma ibana rohana pajongjong usahana.

“Aut sura roham Ompung sada roha ni pomparan ni ompunta mangangkupi huta on, sasaringgit be pe i ganup bulan nda nunga pola bahenon ni huta on i laho padenggan ngoluna dohot pamaju ianakhoon ni huta on?” ninna si Janggual.

Dialsip Ompu Pardomuan sigaretna. Habang angan-anganna tingki dilehon anakhonna na tolu i songon bohal mamungka koperasi di huta. Alai holan dua taon do i mardalan. Sirngom do sude hepeng i so binoto maup manang tu dia. Marsidalian be do jolma na marsali i so manggarar sinalina, ujungna laos mintop ma i so sanga hehe. Dungkon ni ndang olo be anakhonna i mangalehon molo hata hepeng tu huta. Asing ma molo adong parsingkola naung tammat, molo boi diangkupi nasida mandiori ulaonna sai diangkupi do i. Alai molo manektekhon hepeng ndada olo be i, alana gabe bonsir parbadaan do di huta i ala margulut ise jumolo mamangke.

“Ingot Humisar. Si Maradona, si Frengky, si Ronaldo, si Jhon Travolta nama adong di huta on. Dung i si Lady Diana, si Bernaditte, si Julietta. Songon i nama angka goar nuaeng di huta on. Holan mambahen goar si Haposan pe dang adong be, lamu ma na laho boi gabe haposan. So adong be jolma haposan di huta” ninna Ompu Pardomuan songon na marsak.

Hohom si Janggual. Patohohu pandok ni Amongtuana i. Nunga maol na gabe laho haposan di huta, dang dapot be na boi papos roha dohot si haporseaan. Nunga maradu mangait tu ngadol jala pajolo dirina molo dung dompak mammon i. Dang maila be dihata manang dibursikhon deba pangalahona, nunga sude mata hepengon jala situntun lomo ni rohana be. Dos ni roha, satahi, marsiurupan manang pajolo dongan nunga maol dapot songon i di huta nuaeng on. So tontu be rohana mangasi dongan mangangkupi, holan mamingkirhon dirinama ditahi  laos songon dia pe rumangna. Ndada tubu be mudar na mangkuling tung tu hombar jabu pe.

“Ia holan marsiadapari pe nunga lam mago nuaeng, so adong piga be songon i” diuduti Ompu Pardomuan hatana.

“Alai pos do rohangku ingkon na boi dope muse mangolu roha na marsitungkolan, ala huhilala mangkuling dope mudar na saompu di hita. Mangolu dope biarta molo tu sahala ni ompunta na parjolo i. Asal ma manat mandalanton, olo angka parhobas i pajolo angka donganna jala tingkos diuhum parmudaron i huhut hot di aturan naung ditontuhon. Jala buhaan ma i sian na etek Ompung, sian piga-piga halak na boi pasada roha. Ho ompung annon gabe paniroi jala mamereng ise ma parrohaonna na talup tu ulaon songon i” ninna si Janggual.

“Maol do “ ninna Ompu Pardomuan. Nian di rohana na manguji si Janggual do manang na hibul do rohana.

“Santabi Ompung. Molo tung so olo ho ompung mangangkupi ahu, alai holan mulak ahu ingkon do buhaanku patupahon i. Jala molo boi do hundul among on, ingkon hugogo asa dohot ibana mangangkupi huta on”ninna si Janggual.

Tarsonggot Ompu Pardomuan gogo ni rohani si Janggual mandok maringkon. Tompu tamba balga rohana marnida si Janggual. Dang hea dope jumpangna sada dolidoli songon pingkiran ni si Janggual na gomos laho padalanhon na di pingkiranna, alai sai maradu lomosna do jumolo dang porsea tu diri dohot pingkiranna.

“Ianggo laho holan hundul gabe dewan do amongmu si Mangasi, nda ura do i? Holan mardalan ahu, hutopot sadasada ganup jabu na dua lumban on, huelek asa mamillit amongmu dang tung pamaluon nasida ahu. Holan on, tutu do hatami??? Jala boi do haposan amongmu si Mangasi? Toho do ho tu huta mulak dung mangoli? Andigan ho mangoli?” ninna Ompu Pardomuan songon na minar bohina huhut manatap tajom dompak si Janggual. (marudut - BATAKBERCERITA)





Rekomendasi untuk Anda


Connect With Us





Copyright © 2015 riaubangkit
All right reserved